– सुविद गुरागाई
इनरुवातिर हिँड्दा–हिँड्दै कुनै एक दिन
फ्याट्ट पछाडिबाट कसैले कट्टु तान्यो भने
आश्चर्य हुने छैन,
पत्रकारले भनेको ।
जीवन उकालोमा तान्दा–तान्दै कुनै दिन
किरातेश्वरको आठौं सिँढीबाट
भुक्लुक्क गुल्टियो भने
आश्चर्य लाग्ने छैन,
बाबालाई लागेको ।
एउटै लोकार्पण हुन नपाई
एउटै गजल गाउन नपाई
कोसी किनारबाट उठेको
गजलगो सन्दुकको कुनै कुनामा
थपक्क थन्कियो भने
आश्चर्य मानिने छैन,
कविले लेखेको ।
मिलेको छैन पढाइ
राम्रा अक्षरमा मिलाउन खोज्दा–खोज्दै
भित्तेपत्रिकाको नयाँ डमी धमिराले
क्वाप्प खाइदियो भने
आश्चर्य ठहरिने छैन,
गुरुले ठानेको ।
आश्चर्य त तब हुनेछ,
मैले केही देखिन भने
मैले केही सुनिन भने
मैले केही बोलिन भने
मैले केही लेखिन भने
साँच्चै आश्चर्य हुनेछ,
अझै कम्तीमा तीस वटा
होली बाँकी छन्
शिवरात्रि बाँकी छन्
त्यसबीचमा सुविद गुरागाई
बहुलाएन भने ।
०००
bisnuprasad.bg@gmail.com
No comments:
Post a Comment